«Қоғамдық келісім» КММ

«Қоғамдық келісім» КММ, Абай мұрасын оқыту арқылы қазақтың тілі мен әдебиетіне, мәдениетіне деген түрлі этнос өкілдерінің ықыласын арттыру, әрі еліміздің рухани бірлігін нығайту мақсатында түрлі этнос  өкілдерінің жастары арасындағы жыл сайынғы облыстық «Абай оқулары» қашықтықтан өткізілетін онлайн-байқауын ұйымдастырды.

Байқауға көркем сөз оқу және ән айту шеберлігін  игерген 12-25 жас аралығындағы облыстың түрлі этнос өкілдерінің 100-ден астам жастары қатысты. Олардың арасында мектеп оқушылары және колледж студенттерінен бөлек жас оқытушылар мен мамандар да бар.

Байқаудың шарты бойынша үміткер өз таңдауы бойынша ақынның бір өлеңін немесе қара сөзін, М. Әуезовтың «Абай жолы» романынан үзіндіні жатқа оқып жатқан, немесе ақынның бір әнін орындап жатқан  бейнежазба (видеоролик) түсірді. Қазылар алқасы көркем мәтінді таңдау және оқу шеберлігі, қазақ тілінің орфоэпиялық нормаларын сақтауы, ән орындау шеберлігі, өнер көрсету мәдениеті және қазақтың ұлттық киім үлгісі критерийлерін басшылыққа алып, жеңімпаздарды анықтады.

Жүлделі орындарға ие болған байқау қатысушылары дипломдар және естелік сыйлықтарымен марапатталды. Барлық қатысушыларға сертификаттар табыс етілді.