Жастардың креативті ойлау қабілетін, этномәдени тақырыпты заманауи форматта жеткізе білуін бағалаған бұл байқау шығармашылық ізденістің жаңа тынысын ашты.

Байқаудың басты мақсаты – этностардың мәдени мұрасын жаңғырту, ұлттық дәстүрлерді цифрлық кеңістікте насихаттау, сондай-ақ жастар арасында бірлік пен келісім идеяларын кеңінен дәріптеу болды. Қатысушылар қысқа бейнероликтер арқылы этномәдени дүниетанымды заманауи көзқараспен, жаңа форматта және өзіне тән шығармашылық ұстаныммен көрсете алды.

Байқау қорытындысы бойынша үш аталым жеңімпаздары анықталды:

* «Үздік этномәдени бейнежоба» номинациясының жеңімпазы — Шытырымбек Арайлым.
Оның жұмысы дәстүр мен қазіргі күннің үйлесімін көркем визуалдық шешімдер арқылы шебер жеткізгендігімен ерекшеленді.

* «Шығармашылық шеберлік» номинациясының жеңімпазы — Амирбек Гүлжан.
Бейнежоба ерекше идеясы, актерлік шешімі және кәсіби монтажымен көзге түсті.

* «Бірлік пен келісім» номинациясының жеңімпазы — Резина Анель.
Жас автор этносаралық татулық пен толеранттылық құндылықтарын мәнді әрі көркем түрде көрсете білді.

Байқау нәтижелері жастардың цифрлық контент жасауға деген ынтасының жоғары екенін, этномәдени тақырыпқа жаңаша көзқарас қалыптасқанын айқын көрсетті.

Жеңімпаздарды марапаттау рәсімін ҚР Еңбек сіңірген қайраткері, танымал жазушы және драматург Жабал Ерғалиұлы Ерғалиев жүргізді.
Қаламгер жас таланттарға арнайы дипломдар мен естелік сыйлықтарды табыстап, олардың еңбегін жоғары бағалады. Ол жастардың шығармашылық жолдағы алғашқы қадамдарын қолдап, ізденіс пен білімнің маңызын атап өтті.

Салтанатты рәсім қатысушыларға ерекше рухани серпін сыйлап, этномәдени бағыттағы жаңа бастамаларға шабыттандырды.

Жиынға Ш.Уәлиханов атындағы Көкшетау университеті мен А.Мырзахметов атындағы Көкшетау университетінің студенттері қатысты. Әдебиет әлеміне, публицистика мен журналистика саласына қызығушылық танытқан жас буын бұл кездесуді зор ықыласпен қабылдап, қаламгердің шығармашылық шеберханасына жақыннан үңілуге мүмкіндік алды.

Кездесу барысында Жабал Ерғалиұлы журналистика саласындағы көпжылдық тәжірибесімен бөлісіп, сөз өнерінің қадірін, ақпараттың айқын да адал болу қажеттігін, сондай-ақ кәсіби журналистің қоғам алдындағы жауапкершілігін кеңінен сөз етті. Қазіргі ақпараттық кеңістіктің жылдам өзгеріп жатқан сипаты, сөз мәдениетін сақтаудың маңызы және шынайылықты ту етуге қатысты ой-толғамдары жастар үшін құнды бағдар болды.

Студенттер тарапынан қойылған сауалдар да мазмұны терең, маңызы жоғары болды. Жас өрендер драматургиядағы шығармашылық үдерістер, жаңа медиа тенденциялары, журналистік этиканың қыр-сыры және автордың жеке шығармашылық жолы төңірегінде өздерін толғандырған сұрақтарын жолдады. Қаламгер әр сұраққа байыппен жауап беріп, студенттердің ізденімпаздығы мен талпынысына ризашылығын білдірді.

Еркін рухта өткен бұл кездесу жастардың дүниетанымын кеңейтіп қана қоймай, әдебиет пен журналистика салаларындағы жаңа бағыттарға қызығушылықтарын арттыра түсті. Сөз өнерін қастерлеу мен мәдени құндылықтарды дәріптеуге бағытталған осындай игі шаралар жас ұрпақтың рухани дамуына тың серпін беретіні сөзсіз.

Ағымдағы жылы бейбітшілік, қоғамдық келісім мен жалпыұлттық бірліктің символына айналған бірегей институт – Қазақстан халқы Ассамблеясының 30 жылдығы атап өтілуде.
Мерейтойлық жылдың басынан өзара сыйластық, толеранттылық және азаматтық жауапкершілікті қалыптастыруға бағытталған 100 мыңнан астам адамды қамтитын 5 мыңға жуық әр форматтағы іс-шара өткізілді.
Ақмола облысы ішкі саясат басқармасының басшысы Гүлмира Кәрімова этномәдени бірлестіктер мен қоғамдық құрылымдардың өкілдерімен кездесу өткізіп, жыл бойы Ассамблеяның 30 жылдығы аясында атқарылған жұмыстарды қорытындылады.
Шара барысында ассамблея қызметіне белсенді атсалысқан бірқатар тұлғалар Қазақстан халқы Ассамблеясының медальдарымен, Мемлекет Басшысының құрмет грамоталарымен, алғыс хаттарымен марапатталды.
Одан әрі кездесуге қатысушылар ҚХА төрағасының орынбасары М.Әзілхановтың қатысуымен Қазақстан халқы Ассамблеясының 30 жылдығын мерекелеу қорытындыларын шығару мақсатында республикалық «Бірлік пен келісім жолындағы 30 жыл» телекөпіріне тікелей қосылды.
Республикалық телекөпір-форум мерейтойлық жылдың қорытынды іс-шарасы болып, онда жыл ішінде іске асырылған ҚХА-ның үздік тәжірибелері мен қызықты жобалары ұсынылды.
Ақмола облысы бойынша Жұмысшы мамандықтар жылы шеңберінде Сандықтау ауданындағы ассамблеяның еңбек әулеттері туралы жобасы және «Еңбек күші: халықтың бірлігі» жобасы шеңберіндегі рухани-адамгершілік құндылықтарды дамытуға бағытталған «Ұлттық ойындар» кабинетінің ашылуы үздік жобалар деп танылды.

Көкшетау қаласындағы Достық үйінде «Медиация – денсаулық сақтау, білім беру, әлеуметтік қорғау және сот төрелігі жүйесіндегі қақтығыстарды реттеу құралы» тақырыбында дөңгелек үстел өткізілді. Іс-шараның басты мақсаты – медиацияның қақтығыстарды шешуден бөлек, диалог пен сыйластық мәдениетін қалыптастырудағы рөлін көрсету және оны қоғамның барлық саласы үшін қолжетімді ету.

Дөңгелек үстелге этномедиация кеңесінің төрағасы Гүлнәр Серікқызы Мәдиева, орынбасары Самал Ибраевна Ілиясова, «Вайнах шешен-ингуш қауымы» Қоғамдық бірлестігінің төрағасы Яндиев Герихан Ибрагимович және «Байтақ» партиясының филиалының төрағасы және этносаралық қатынастар саласындағы ақпараттық-түсіндіру тобының мүшесі Баяжума Асылбек қатысты.

Этномедиация кеңесінің төрағасы Гүлнәр Серікқызы Мәдиева медиация аясындағы келіссөздер процесінің заманауи моделін таныстырып, тараптардың өзара іс-қимылы арқылы тұрақты және өзара тиімді келісімдерге қол жеткізу жолдарын нақты мысалдармен көрсетті.

Этномедиация кеңесінің орынбасары Самал Ибраевна Ілиясова «Қазақстанның білім беру мекемелерінде буллинг құрбандарын құқықтық қорғау» тақырыбында сөз сөйлеп, медиация негіздерін оқу орындарының білім беру бағдарламаларына енгізуді ұсынды. Сонымен қатар, мектепке дейінгі мекемелерде де медиация элементтерін қолдану арқылы балаларды келіссөз жүргізу және қақтығыстарды сындарлы шешу дағдыларына үйретудің маңызы ерекше атап өтілді.

Дөңгелек үстелге білім беру, денсаулық сақтау, әлеуметтік қорғау және сот төрелігі салаларының өкілдері, сондай-ақ Ш. Уәлиханов пен А. Мырзахметов атындағы университеттердің заң факультетінің студенттері қатысты.

Іс-шара барысында қатысушылар тәжірибе алмасты, ортақ негіздер мен жалпы бағдарларды анықтап, медиацияны әр салада тиімді қолдану бойынша практикалық қадамдарды белгіледі.

Көкшетау қаласындағы Достық үйінде Қазақстан Халқы Ассамблеясы республикалық этномедиация кеңесінің мүшесі, медиация бойынша PhD докторы Гүлмира Нарбаеваның қатысуымен этносаралық қатынастар бойынша аудандық және қалалық ақпараттық-түсіндіру топтарының мүшелеріне арналған семинар-тренинг өтті.
​Аталмыш шара этносаралық келісімді нығайту бойынша ақпараттық-түсіндіру іс-шараларын ұйымдастыру бойынша мемлекеттік-әлеуметтік тапсырыс негізінде, сондай-ақ қоғамдық алаңда және ақпараттық кеңістікте этносаралық қақтығыстардың алдын алу жөніндегі іс-қимылдың кешенді жоспарын іске асыру мақсатында ұйымдастырылды.
Ақмола облысы ішкі саясат басқармасы басшысының орынбасары, Қазақстан халқы Ақмола ассамблеясы хатшылығының меңгерушісі Сабырхан Кенжебаев этносаралық келісімді сақтауда ақпараттық-түсіндіру топтары мүшелерінің маңызды рөлін айта келе, семинардың жұмысына сәттілік тіледі.
Қатысушылар этносаралық қақтығыстардың алдын алу, этномедиация және ақпараттық-түсіндіру топтарының құзыретін арттыру, этносаралық дауларды шешу тәжірибесі мәселелері бойынша мағлұмат алып, тәжірибе алмасты.