«Қоғамдық келісім» КММ

Ағымдағы жылдың 14 қыркүйегінде «Қоғамдық келісім» КММ-де Тілдер апталығы аясында «Ұлы даланың ұлтаралық тілі» форумы өтті.

Жыл сайын мемлекеттік тілді меңгерген түрлі этнос өкілдерінің қатары оқушылар мен студент жастармен толығуда. Жиынға қатысушылар форум барысында мемлекеттік тілде сөз сөйлеп, өлеңдер оқыды.

Осы туралы «Қоғамдық келісім» КММ басшысының орынбасары Айгүл Нұрмағанова өз сөзінде «Қазіргі уақытта қазақ тілін қолдану аясы кеңейіп, оны көптеген азаматтарымыз игеруде. Бұл біздің ұлттық болмысымыздың тағы бір жарқын көрінісі. Мемлекеттік тілді білу азаматтарымызға өздерін бір үлкен және біртұтас қазақ отбасының, шын мәнінде қазақ ұлтының мүшелері ретінде сезінуге мүмкіндік береді» – деді.

«Қазақ тілі мен мәдениеті» ҚБ төрағасы Марат Қойшин, “Қазақстанның әзірбайжандар қауымдастығы” РҚБ облыстық филиалының төрағасы Назим Шихалиев жастарға арнап мемлекеттік тілді және басқа да тілдерді үйрену қажеттігі туралы айтты. Осы орайда, әрқайсысы ұлы Абайдың «бөтен тіл мен мәдениетті білу адамды осы халықпен тең құқықты етеді», «Тіл үйрену-әлемге жаңа терезе ашу» деген нақыл сөздерін келтірді.

Залға жиналғандар Ж.Мусин атындағы педагогикалық колледж студенті Яна Крючек пен Назарбаев интеллектуалды мектебінің оқушысы Эдгард Вицкенің Абай тілін үйреніп, өзі туралы қазақ тілінде баяндағанына қызу қолдау көрсетті. Одан кейін  Эдгард Вицке, Роман Борисовский, Юрий Кочетыгов, Милана Скорик мемлекеттік тілді жетік менгергенін және домбырада ойнау шеберлігін көрсетіп көрермендер қошеметіне бөленді.

Форум соңында «Туған жердің дауысы» онлайн-фестивалінің, «Qazaqtime» облыстық байқауының жеңімпаздарына, сондай-ақ облыстық Достық үйі жанындағы Мемлекеттік тілді дамыту және насихаттау орталығының белсенді мүшелеріне «Қоғамдық келісім» КММ-нің Алғыс хаттары табысталды.